Stjórnsýsla, fundargerðir til staðfestingar

1.  

1001001F - Félagsmálanefnd - 100

1.1. 

1001033 - Sérstakar húsaleigubætur - endurskoðun á reglum 2010.

Afgreiðsla: Samþykkt samhljóða.

2.  

1001005F - Bæjarráð - 117

2.10. 

0912041 - Samkomulag bæjarstjórnar við EFS.

Sjá dagskrárliði 5 – 7.

2.11. 

1001054 - Fjárhagsáætlun 2010

Sjá dagskrárliði 5 – 7.

2.12. 

1001055 - Þriggja ára áætlun 2011-2013

Sjá dagskrárliði 5 – 7.

Fundargerðir til kynningar

3.  

1001036 - 345. fundargerð stjórnar SSH.

Afgreiðsla: Lagt fram.

Almenn erindi

4.  

1001057 - Bréf frá Slökkviliði, dags 15.01.2010, ásamt gjaldskrá.

„Bæjarstjórn samþykkir framlagða gjaldskrá.“

Afgreiðsla: Samþykkt samhljóða

5.  

0912041 - Samkomulag bæjarstjórnar við EFS.

Til máls tóku undir málum 5 – 7: PM, GGG, MJ, SRM, SM, KG, KS og KFB.

Pálmi Þór Másson, bæjarstjóri, gerði ítarlega grein fyrir skýrslu bæjarstjórnar um „Tillögur bæjarstjórnar um fjárhagslegar aðgerðir.“, m.v.t. 2. gr. samkomulags bæjarstjórnar við EFS.

Tillaga D-lista og MJ:

„Bæjarstjórn samþykkir framlagða skýrslu um „Tillögur bæjarstjórnar um fjárhagslegar aðgerðir“. Bæjarstjóra falið að afhenda skýrsluna Eftirlitsnefnd með fjármálum sveitarfélaga, eigi síðar en 27. janúar 2010.“

Afgreiðsla: Samþykkt með 4 atkvæðum gegn 3 atkvæðum fulltrúa Á-lista.

Tillaga fulltrúa Á-lista, KS:

„Bæjarstjórn samþykkir að fresta niðurskurði og skerðingu á grunnþjónustu við íbúa sveitarfélagsins og leita strax samninga við önnur sveitarfélög um mögulega sameiningu.“

Greinargerð

Bæjarfulltrúum ber skylda til að leita allra leiða til að komast hjá niðurskurði og skerðingu á grundvallarþjónustu við íbúa Álftaness.

Óásættanlegt er með öllu að skera niður sjálfsagða þjónustu við börn og unglinga eins og áformað er í fjárhagsáætlun.

Afgreiðsla: Vísað frá með 4 atkv. gegn 1 atkv. fulltrúa Á-lista, KS. SM og KFB sátu hjá.  

Bókun fulltrúa Á-lista, KS:

„Ástæður þess að sveitarfélagið er komið í þrot má rekja til margra samverkandi þátta. Þar er fyrst að nefna að ráðist var í mikla uppbyggingu íbúðarhúsnæðis upp úr aldamótunum sem kallaði á aukna þjónustu við aukinn fjölda íbúa.

 Uppbyggingin kallaði einnig á byggingu nýs leikskóla auk stækkunar skóla og  íþróttahúss en fjármögnun allrar uppbyggingar var tekin að láni. Þá hafði uppbygging unglingadeildar grunnskólans hér heima í för með sér mikinn kostnað vegna stóraukins húsnæðis- og launakostnaðar.  Þessar ákvarðanir voru umdeildar innan bæjarstjórnar en D-listinn knúði þær í gegn í krafti meirihluta síns.

Þessi uppbygging auk breytts fjárhagsumhverfis sem fylgir kreppunni og er á ábyrgð sama flokks  hefur sett sveitarfélagið í þrot.

Ábyrgð þess að sveitarfélagið er komið í þrot er því fyrst og fremst vegna ákvarðana D-lista frá fyrri árum.

Nú er svo komið að sveitarfélagið Álftanes á þess ekki að óbreyttu kost að veita íbúum sínum og þá serstaklega börnum og unglingum þá þjónustu sem önnur sveitarfélög veita.“

Framlagt minnisblað fulltrúa Á-lista, KS:

Legg fram minnisblað frá því 20 janúar sl. þar sem ég geri grein fyrir sjónarmiðum mínum og athugasemdir við stjórnsýslu sveitarfélagsins.

Bókun fulltrúa Á-lista, KS:

„Ég geri alvarlegar athugasemdir við þau vinnubrögð sem hér hafa viðgengist að undanförnu. Ég vek athygli á að bæjarstjórn hefur hvorki  fjallað um né samþykkt að vinna að uppsögnum starfsmanna sveitarfélagsins eða endurskoða stjórnsýslu þess. Þrátt fyrir það hefur formaður bæjarráðs tilkynnt munnlega nokkrum starfsmönnum án heimildar bæjarstjórnar að þeim verði sagt formlega upp störfum um næstu mánaðamót.  Þessi vinnubrögð er slæm stjórnsýsla enda óvönduð og ógegnsæ og persónulega á ábyrgð viðkomandi bæjarfulltrúa.

Það er aumt til þess að vita að kaupa þurfi utanaðkomandi aðila til að semja niðurskurðartillögur þar sem pólitísk stjórnsýsla er nær óstarfhæf og mestur kraftur sumra bæjarfulltrúa virðast helgaðir framboðsbaráttu.“

Bókun fulltrúa Á-lista, KS:

„Á síðasta bæjarstjórnarfundi var lögð fram tillaga K.S.  um að skoða sameiningakosti við þrjú sveitarfélög, Hafnarfjarðar, Reykjavíkur auk Garðabæjar. Samþykkt var samhljóða að vísa tillögunni til bæjarráðs en þar

hefur hún ekki fengist tekin fyrir. Tveir bæjarfulltrúar Álftaness læddust

svo morguninn eftir bæjarstjórnarfundinn, í skjóli myrkurs, á leynilegan fund með fulltrúum bæjarstjórnar Garðabæjar og ræddu þar sameiningarmál. Viðræður þessar voru án umræðu og heimildar bæjarstjórnar Álftaness.  Svo virðist sem fulltrúar Garðabæjar hafi hafnað viðræðum um sameiningu að svo stöddu. Þessi vinnubrögð er slæm stjórnsýsla enda óvönduð og ógegnsæ og persónulega á ábyrgð viðkomandi bæjarfulltrúa.“

Bókun frá bæjarfulltrúum Á-lista, SM og KFB:

„Þann 14. janúar sl. sendu bæjarfulltrúar Á-lista  stjórnsýslukæru til ráðuneytis sveitastjórnarmála vegna meints vanhæfis tveggja af þremur nefndarmönnum í Eftirlitsnefnd með fjármálum sveitarfélaga.

Komið hefur fram við athugun okkar, að mikil tengsl eru á milli einstaklinga í Eftirlitsnefnd með fjármálum sveitarfélaga og einstakra starfsmanna sem vinna með fjárhagsmál Álftaness. Tengslin liggja m.a. í gegnum endurskoðunarfyrirtækið KPMG og tengjast stjórnsýlsu Garðabæjar.

Formaður Eftirlitsnefndarinnar er fyrrum einn af eigendum og starfsmönnum KPMG og fyrrum endurskoðandi Garðabæjar. Samstarfsmaður hans og meðeigandi með honum í KPMG til margra ára er núverandi endurskoðandi Garðabæjar og er sami aðili og bæjaryfirvöld á Álftanesi hafa kallað sem ráðgjafa nú við fjárhagsáætlanagerð og samninga við Eftirlitsnefndina, m.a. um sameiningu Álftaness við Garðabæ. Báðir eru þessir endurskoðendur búsettir í Garðabæ og eins og fyrr segir með tengsl við stjórnsýslu þar.

Formaður Eftirlitsnefndarinnar réð síðan fyrirtækið R3 til að gera fjárhagsúttekt á rekstri Álftaness, sem við höfum m.a. gagnrýnt fyrir að draga upp of dökka mynd af vanda sveitarfélagsins. Eigandi og starfsmaður R3 og sá er annaðist fjárhagsúttektina er samstarfsaðili núverandi og fyrrverandi endurskoðenda Garðabæjar í gegnum samvinnu R3 og KPMG.

Að lokum er rétt að geta þess að fyrrum framkvæmdastjóri Sambands íslenskra sveitarfélaga situr í Eftirlitsnefndinni, en hann hefur á vettvangi Sambandsins talað fyrir sameiningu Garðabæjar og Álftaness.

Af framansögðu teljum við ljóst að nefndir aðilar, sem allir koma að viðkvæmum fjárhags- og sjálfstæðismálum Álftaness nú í viðræðum sveitarfélagsins við stjórnvöld og önnur sveitarfélög, sérstaklega Garðabæ, eru vanhæfir til að vinna með hlutlausum hætti að ráðgjöf eða ákvarðanatöku um málefni sveitarfélagsins.

Við teljum fjárhagsúttekt þessara aðila í desember og ráðleggingar þeirra nú til bæjaryfirvalda um tillögugerð vegna fjárhagsmála vera hlutdrægar. Tillögurnar miða ekki að því að rétta fjárhag Álftaness til þess að þar verði rekið sjálfstætt sveitarfélag, heldur er verið að stýra málum til sameiningar.“

6.  

1001054 - Fjárhagsáætlun ársins 2010

Pálmi Þór Másson, bæjarstjóri, gerði grein fyrir fjárhagsáætlun ársins 2010, sem samanstendur af rekstraráætlun, sjóðsstreymi og efnahagsreikningi.

Tillaga D-lista og MJ:

„Bæjarstjórn samþykkir að vísa fjárhagsáætlun ársins 2010 til annarrar umræðu sem áætluð er þann 4. febrúar n.k.“

Afgreiðsla: Samþykkt samhljóða.

Tillögur frá bæjarfulltrúa Á-lista, SM og KFB:

„Bæjarráð samþykkir að gera ríkissjóði tilboð í að kaupa  hlutafé Sveitarfélagsins Álftaness  í Fasteign á fjórföldu nafnverði . Andvirði sölunnar verði nýtt til að kaupa íþróttarmannvirkin af Fasteign, létta á rekstri bæjarsjóðs og styrkja verulega eiginfjárstöðu sveitarfélagsins“.

Greinargerð; Hlutafé sveitarfélagsins í Fasteign er 400 milljónir að nafnvirði en samkvæmt mati KPMG frá 2008 má áætla að raunvirði hlutabréfanna í frjálsri sölu væri á milli 3-4 falt nafnverð. Lagt er til að ríkisvaldinu verði gert tilboð í að kaupa bréfin á fjórföldu nafnverði eða á 1.600 milljónir. Andvirðið verði notað til að kaupa til baka íþróttamannvirkin, en framreiknað verð þeirra ætti að vera rúmar 2000 milljónir. Gengi þetta eftir væri létt af rekstri  um 150 milljónir árlega og vegna söluhagnaðar hlutabréfanna færðist eigið fé sveitarfélagsins upp um 1.100 milljónir, væri orðið jákvætt og hærra en árið 2006. Ætla má að ríkið sjái ýmiss við það að koma sem eignaraðili að Fasteign og treysta samstarf við þetta fasteignafélag sveitarfélaganna og Háskólans í Reykjavík sem nýtur ríkisábyrgðar.

Afgreiðsla: Vísað frá með 4 atkv. gegn 3 atkv. fulltrúa Á-lista.

Tillaga fulltrúa Á-lista, SM og KFB:

„Bæjarráð samþykkir að gera ríkisjóði tilboð um kaup á lóð fyrir menningar- og náttúrufræðisetur á skipulögðu atvinnusvæði í grænum miðbæ. Lagt er til að söluverð lóðarinnar verði 400 milljónir. Ef ríkissjóður vildi fremur kaupa Áhaldahúslóð sveitarfélagsins við Kasthúsatjörn,  fyrir hliðstæða fjárhæð væri sá kostur líka í boði. Sala lóðar fyrir menningar- og náttúrufræðisetur til ríkissjóðs tengdist þeirri viljayfirlýsingu sem fyrrverandi bæjarstjóri gerði í apríl 2009 við ráðherra umhverfismála og menntamála um samstarf á sviði umhverfis og menningarmála. Andvirði sölunnar verði ráðstafað til  kaupa á íþróttamannvirkjum, eða til uppgreiðslu skulda. Með sölunni væri eigið fé sveitarfélagsins styrkt verulega, létt á rekstri og skref stigið fram til nýsköpunar í atvinnumálum á Álftanesi“.

Greinargerð; Með viljayfirlýsingu, Sveitarfélagsins Álftaness, umhverfisráðherra og menntamálaráðherra frá 8. apríl 2009 var ákveðið að þróa samstarf þessara aðila í umhverfis- og menningarmálum tengt verndun Skerjafjarðar og reksturs gestastofu og vísast í því sambandi til umræddrar viljayfirlýsingar.

Með sölunni er eigið fé sveitarfélagsins styrkt um rúmar 300 milljónir og andvirði sölunnar ráðstafað til kaupa á íþróttamannvirkjum eða til niðurgreiðslu lána.  Ef þessi sala gengi eftir, ásamt sölu hlutafjár í Fasteign eins og lagt er til á þessum fundi er eigið fé sveitarfélagsins  aftur orðið svipað og fyrir hrun haustið 2008 og mun auðvelda endurskipulagningu bæjarsjóðs.“

Afgreiðsla: Vísað frá með 4 atkv. gegn 3 atkv. fulltrúa Á-lista.

Bókun fulltrúa Á-lista, SM og KFB:

„Við áteljum að tillögur okkar um sölu á hlutafé í Fasteign og tilboði til Ríkissjóðs um kaup á lóð undir menningar- og náttúrufræðisetur hafi ekki fengið efnislega afgreiðslu hér á fundinum.

Athygli vekur líka hversu umræður og skýringar meirihluta bæjarstjórnar á fjárhagsáætlun og tillögum um fjárhagsmál eru yfirborðslegar og metnaðarlausar.

Tilögum meirihluta bæjarstjórnar er ekki ætlað að endurskipuleggja sjálfstætt sveitarfélag heldur eru þær pólitísk áætlun D-listans, sem Margrét Jónsdóttir styður, til að knýja fram sameiningu sveitarfélagsins við Garðabæ. Skýringar og fylgigögn með tillögunum eru um margt ónákvæmar og villandi og hlutdrægar, enda eru skýrsluhöfundar endurskoðendur Garðabæjar, og framsetningin öll miðuð við sameiningu. Í þessu skini eru t.d. skuldbindingar bæjarsjóðs tengdar uppbyggingu, aðeins nefndar sem skuldir en aldrei vikið að þeim nýju tekjustofnum og hagræðingu sem skapast með uppbyggingu miðsvæðisins.

Við ítrekum afstöðu bæjarfulltrúa Á-lista að hafna stórfelldri  skattlagningu á íbúana og miklum niðurskurði sem aðallega bitnar á þjónustu við börn og unglinga. Samtals eru þessar álögur og niðurskurður um 300 milljónir þegar aðgerðirnar hafa allar komið til framkvæmda. Þessar aðgerðir munu strax leiða til flótta úr samfélaginu, draga niður verð eigna og þegar til lengri tíma er litið lækka skatttekjur. Með áformum um frestun eða stöðvun uppbyggingar í miðbænum verður bæjarsjóður af hagnaði vegna lóðasölu upp á hundruðir milljóna og lokar um leið á framtíðar vöxt og framtíðar tekjur bæjarsjóðs sem búið var að undirbúa. Á sama tíma og allar íþyngjandi aðgerðir meirihlutans bitna á íbúunum er ekki haldið fram kröfum á ríkisjóð um leiðréttingu á jöfnunargreiðslum eða aðkomu að því tjóni, u.þ.b. 1000 milljónir, sem efnahagshrunið hefur valdið bæjarsjóði.

Á fundinum höfum við kynnt tillögur okkar að fjárhagsáætlun, en þær sína að hægt er að endurskipuleggja reksturinn og gera hann jákvæðann án þess að fara í stórfelldan niðurskurð á þjónustu eða skattlagningu, með trú á samfélagið og hægri uppbyggingu, enda náist samningar um eðlilega leiðréttingu á þeim kröfum sem sveitarfélagið hefur gert á Ríkissjóð vegna Jöfnunarsjóðs og efnahagshrunsins."

Fulltrúar Á-lista, SM og KFB, lögðu fram til kynningar og umræðu þrenn drög að fjárhagsáætlun Á-lista fyrir árið 2010.

Bókun fulltrúa Á-lista, KS:

„Tillögur meirihluta um fjárhagslegar aðgerðir eru ekki raunhæfar. Þær byggja á að gera verulegar breytingar á stjórnsýslu sveitarfélagsins sem ólíklegt að takist þannig að spara megi þær upphæðir sem ætlað er. Fyrst og fremst á að skera niður að verulegu leiti æskulýðs og tómstundastarf barna og unglinga. Sá niðurskurður gerir búsetu hér óaðlaðandi.“ 

Bókun D-lista og MJ vegna bókunar Á-lista á 117. fundi bæjarráðs:

„Tillögurnar tvær og bókun fulltrúa Á – lista í bæjaráði eru undarlegar í ljósi erfiðrar stöðu bæjarsjóðs. Það er merkilegt að nú hefur fulltrúi Á-lista snúist í afstöðu sinni um 180° Með tillögum þessum viðurkennir fyrrverandi bæjarstjóri að bæjarfélagið eigi í verulegum vandræðum. Sala eigna bæjarsjóðs eru meðal þeirra úrræða, sem nefnd eru til sögunnar í skýrslu bæjarstjórnar um fjárhagsleg úrræði, sem er til umfjöllunar á þessum fundi bæjarstjórnar. Sú skýrsla var á dagskrá vinnufundar bæjarstjórnar sl. fimmtudag og virðist fyrrverandi bæjarstjóra hafa líkað tillögur um sölu eigna og gert þær að sínum.

Það er aldeilis með ólíkindum að því sé haldið fram í bókuninni að bæjarsjóður verði af lóðasölu upp á hundruð milljóna á miðsvæðinu, með frestun eða stöðvun framkvæmda.

Ljóst var strax á haustdögum 2006 að ráðuneyti sveitarstjórnarmála hafði þá þegar tækifæri til þess að grípa inn í einkennilega atburðarrásina á Álftanesi, en eftirlitsnefndin virðist bara ekki hafa verið á vaktinni þá.

Allar þær aðgerðir sem nú liggur fyrir að þurfi að grípa til vegna stöðu bæjarsjóðs, ganga út frá því að viðmið hefur verið sett um hvað teljist grunnþjónusta bæjarfélagsins. Þrátt fyrir að í  rannsóknarskýrslu eftirlitsnefndar á fjárhag Álftaness sé lagt upp með að til verulega harkalegra aðgerða þurfi að grípa bæði varðandi tekjur og gjöld, þá hefur það alls ekki gengið eftir í tillögum bæjarstjórnar. Auknar álögur vegna útsvars og fasteignagjalda eru langt innan viðmiða skýrslunnar. Við það er miðað í niðurskurði rekstrar bæjarsjóðs að engar grundvallar breytingar verða á þjónustu við íbúana. Þar er við það miðað að sú þjónusta sem í boði er nú verði boðin áfram. Því er alfarið hafnað að ganga lengra.“

Bókun fulltrúa Á-lista, SM og KFB:

„Enginn viðsnúningur er í afstöðu fulltrúa Á-lista til fjárhagsmála á Álftanesi. Legið hefur fyrir síðan 2006, þegar Á-listi tók við rekstri á Álftanesi að sveitarfélagið býr við mikinn rekstrarvanda, en á síðasta ári D-listans, frá síðasta kjörtímabili var hallarekstur um 320 milljónir.

Á-listinn náði að rétta  stöðuna á árinu 2007 við, til verulegs hagnaðar, en lenti svo í efnahagshruninu 2008 sem leiddi til 800 milljóna króna halla á því ári. Efnahagshrunið hefur valdið tjóni í efnahag sveitarfélagsins upp á rúman milljarð.

Óþarfi er fyrir fulltrúa D-listans að fyrtast við þó að bæjarfulltrúar Á-listans hafi forystu um tillögugerð að sölu hlutafjár í Fasteign og sölu lóðar til Ríkissjóðs og óábyrgt, miðað við stöðu sveitarfélagsins, að vísa þeim tillögu okkar frá án efnislegrar afgreiðslu.

Við mótmælum harðlega því sjónarmiði sem fram kemur í bókun meirihlutans að niðurskurður í rekstri valdi ekki grundvallarbreytingum á þjónustu við íbúana. Við teljum þvert á móti að hann muni vega þungt að grunnþjónustu á Álftanesi, einkum hvað varðar börn og unglinga.

Við ítrekum að allar aðgerðir bæjaryfirvalda miðast við að leggja niður sjálfstætt sveitarfélag á Álftanesi og þar skortir bæði framsýni og metnað.“

Bókun fulltrúa D-lista og MJ:

„Bókun fulltrúa Á-lista, SM og KFB, lýsir afneitun þeirra á stöðu bæjarsjóðs í dag. Rétt þykir að benda á þá staðreynd að fulltrúar Á-lista tóku við meirihluta bæjarstjórnar í júní 2006.“

7.  

1001055 - Þriggja ára áætlun áranna 2011-2013

Þriggja ára áætlun 2011-2013 lögð fram til fyrri umræðu.

Tillaga D-lista og MJ:

„Bæjarstjórn samþykkir að vísa 3ja ára fjárhagsáætlun áranna 2011 - 2013 til annarrar umræðu sem áætluð er þann 4. febrúar n.k.“

Afgreiðsla: Samþykkt samhljóða.